Akanfoↄ amammerɛ ne amanneɛ gu ahodoↄ. Amammerɛ yɛ dwumadie soronko a ɛda nnipakuo bi adi. Amanneɛ no yɛ nneyↄe a wↄde da ammamerɛ adi. Enti abadinto, bragorↄ, awaregyeɛ ne ayiyↄ nyinaa yɛ Akanfoↄ amammerɛ. Na ↄkwan a wↄfa so yↄ yeinom mu biara no na wↄfrɛ no amanneɛ. Yɛn nkutahodi yi bɛdↄ amammerɛ a yɛabobↄ so yi nyinaa mu asukↄ mmaako mmaako.

Twi: Akanfo |Abadintoↄ |Naming ceremony

Toa yɛn wɔ ammamerɛ YouTube channel no so.

Akanfoↄ amammerɛ a ɛdikan onipa asetenam ne abadinto. Akanfoↄ nto abadoma din gyesɛ wadi nnanwↄtwe ansa. Ɛfirisɛ wↄgyedi sɛ akokoaa no bɛtumi ayɛ honhom bi a waba wiase nsrahwɛ. Ne saa nti wↄde abↄtafoa no ne ne na sie ↄdan mu nna nson sɛdeɛ amanneɛ teɛ. Nna nson yi mu no, wↄbu abↄfra sɛ ↄyɛ ↄhↄhoↄ. Enti wↄnna ahosɛpɛ biara adi mfa ne mmaeɛ ho. Sɛ mpo akokoa no toa nananom berɛ yi mu a, wↄnnyam no.

Nna nson akyiri no wↄgye tom sɛ abↄfra no aba asetena. Enti wabɛka abusua no ne amansan ho. Afei wↄyɛ amanneɛ de ma no din. Wↄde amanneɛ da akokoa no adi kyerɛ amansan. Ɛfirisɛ abↄfra no amma abusua no nkutoo mmaeɛ. Wↄnam saa yↄ so hyɛ ↄman mu no nyinaa sɛ ↄyɛ wↄn ba nti wↄnkyerɛ no nananom atempↄn na ↄnyini mmɛyɛ ↄpanyin pa. Berɛ no ara mu wↄkyerɛ abↄfra no n’asɛdeɛ sɛ ↄman ba pa.

Amammerɛ kwan so no, abusua mpayinfoↄ no mu bi na ↄda din no adi. Mpɛn pii no wↄdi kan amanneɛ kwan so bisa nananom din a wↄmfa nto abↄfra no. Ne nyinaa mu no abↄfra no agya abusua na ɛto din no. Saa din no na ↄpanyin no da no adie. Ne nyinaa mu no, ne din a ɛdikan no ↄdefiri awoeɛ. Ɛno na wↄfrɛ no akradin; ɛkyerɛ nnanwↄtwe no mu da a wↄwoo no. Edin a ɛtↄso mmienu no nso sa ara, ɛne n’awoeɛ wↄ twaka. Ɛfa edin ahodoↄ deɛ yɛapɛnsmpɛnsɛm mu wↄ ↄfa a ɛtoa so no mu. Deɛ ɛtↄso mmieɛnsa no yɛ abusuadin. Din no tumi yɛ pii nanso ne titiriw ne mmiensa yi.

Wↄde abↄfra no ba badwam de no bɛto fam. Wↄyi apaeɛ de hyɛ abadinto no ase. Wↄnam apaeɛ no so srɛ nhyira ma dom no nyinaa ne titiriw ne abↄfra no. wↄsrɛ nananom sɛ wↄnnom akokoaa no asetenam akadeɛ nyinaa na ↄnyini mmɛyɛ ↄpanyin pa. Abↄfra no, ne na ne ne nananom ne badwa no di nhwɛanim. Ↄpanyin a ↄbɛyɛ abↄfra no so hwɛfoↄ no na ↄyↄ amanneɛ no nyinaa. Ↄbarima na ↄyɛ ↄbarima so hwɛfoↄ sa ara nso na ↄbaa yɛ ↄbaa so hwɛfoↄ.

Wↄma akokoaa no nyankoɛm anhwene; afei wↄma ↄne ne na hyire adwini ahodoↄ de yɛ dwumadie no ho adanseɛ. Ɛna no miamia ntoma fitaa. Sa ara na akokoaa no nso to afadeɛ fufuo. Afei ne so hwɛfoↄ ma no so huri no kↄ soro mprɛnsa. Ↄyↄ deda abↄfra no adi kyerɛ nananom. Afei, yɛmfa no sɛ abↄfra no yɛ ↄbarima a wↄwoo no Fiada. Ↄpanyin no bisa sɛ ‘Nnɛ yɛ da bɛn? Fiada nananom, nnɛ yɛde akokoaa a ↄne yɛn rebɛtena yi kyerɛ anↄpa nsoroma.’ Enti wↄde akokoaa no kyerɛ ↄsoro, asase ne nananom de srɛ adom ne nhyira ma no.

Wↄtoa dwumadie no so de abↄfra no to ayaya; de nsa ne nsuo mu biara ka n’ano mprɛsa. Wↄreka n’ano no na wↄreka kyerɛ no sɛ ‘wohunu nsa a ka sɛ ɛyɛ nsa; wohunu nsuo a ka sɛ ɛyɛ nsuo. Wei kyerɛ sɛ ↄnyɛ ↄnokwafo. Bio, ɛkyerɛ no sɛ ↄnka ne nananom nnuane no bi nhwɛ na ↄnyɛ aba a tenase. Afei wↄbↄ ne din ka n’asɛdeɛ kyerɛ no: ‘Kofi Afunya, nyini fa ↄbuo ma wo nananom, w’awofoↄ ne mpayinfoↄ nyinaa; yɛ anokoro, yɛ ↄyamyɛfoↄ, bu nananom atempↄn na asi wo kra yie; bɛbↄ yɛn kyidom; bɛboa ma yɛn man yi nyɛ krabɛhwɛ; ma nsadweam mpare wo, …’ Afei wↄto anigye nnwom ahodoↄ.

Ne korakora, wↄgye akyɛdeɛ de bↄ abadoma no atenaseɛ. Wↄma no sika ne akyɛdeɛ ahodoↄ a ɛsɛ fata. Deɛ aka deɛ yɛ adidie ne ↄnom.

Akanfoↄ / Akanfo Din Akuo

Akanfoↄ ma akokoaa din ahodoↄ. Edin no mu biara wↄ nkyeraseɛ ne sɛdeɛ wↄnya no. Wↄn din tumi kyerɛ nanwↄtwe no mu da a wↄwoo onipa no, onipa no gyinaberɛ ne na mma nnidisoↄ mu, deɛ na ɛrekↄ so berɛ awↄwoo no, n’awoↄ ne dabↄne anaa nnapↄnna twaka, akwanhyia anaa asiane bi ne onipa no awoↄ twaka, onipa no awoↄ ho nkukuhwease, onipa no ahosuo anaa ne tebea, afei abusua anaa ntↄn a ↄbↄ.

Twi: Akakradin

Akradin kyerɛ nanwↄtwe no mu da a wↄwoo onipa no. Nnipa pii gye wↄn kradin so. Wↄayɛ binom nso deɛ adakamudin. Edin a ɛwↄ hↄ nso wↄnnye so na wↄfrɛ no adakamudin. Akanfoↄ wↄ akradin dunnan; mmarima deɛ nsↄn na mmaa nso deɛ sa ara. Wↄn nyinaa na yɛada wↄn adi ha yi.

Akanfoↄ gyedie ne sɛ onipa kradin ne onipa no kra wↄ twaka. Ne saa nti mmusua kuo binom de wↄ akradin sie. Wↄyɛ sa de bↄ wↄn ho ban. Wↄsusu sɛ abↄnefoↄ bɛtumi de ako atia wↄn. Ɛfirisɛ akradin na wↄtumi de frɛ nya nnipa kra ntɛm. Enti wↄde di dwuma yie wↄ nsumansɛm ne abosomsɛm mu.

Ɛnyɛ nnipa nko na wↄwↄ akradin; na mmom anyame ne abↄdeɛ ahodoↄ nso wↄ bi. Akanfoↄ gyidie ne Ↄbↄadeɛ bↄↄ ne ho Memeneda (Me Ne Me N e Da). Me-ne-me-ne kyerɛ sɛ deɛ ↄde ne ho; deɛ obi biara nhyɛ ne so, deɛ ↄnnan obi, deɛ ↄbↄↄ ne ho. Enti Akanfoↄ frɛ da yi menemeneda – deɛ ↄde ne ho da. Enti Akani ka sɛ Tweaduampↄn Kwame a na asekyerɛ ne no. Bio, Akanfoↄ ka sɛ Asase Yaa a ɛkyerɛ sɛ Ↄbↄadeɛ bↄↄ asase Yawda. Sa ara na abosom ahodoↄ nso wↄ akradin. Enti wo bɛte Tano Kofi, Kwaku Firi ne deɛ ɛkeka ho. Kwaku Ananse nso sa ara na ɛteɛ.

Akradin Mmrane

Akradin no mu biara wↄ ne mmrane a ɛkyerɛ suban. Akradin no mmrane wↄn nnyesoↄ na ɛdidisoↄ yi:

Berɛ A Wↄwoo Onipa No

Din a ɛte sa no kyerɛ afahyɛ, ↄko anaa dwumadie soronko bi a na ɛrekↄ so berɛ a wↄwoo onipa no. Wↄn a wↄwo wↄn Akanfoↄ asranna mu nnna soronko no nya din yi bi.  Asranna no wↄ nna ahodoↄ pii: nnabↄne ne nna paa. Kwasidae, Memeneda Dapaa, Awukudae, Fofie, Benada Dapaa. Enti edin binom te sɛ Kofi Fofie, Kwasi Adae, Afua Fofie, Adwoa Dapaa asekyerɛ ne no. ɛsiane sɛ nnapↄna yi si wↄn akra da nti wↄn akradin ka saa din no ho.

Onipa awoda tumi si Akanfoↄ afahyɛ berɛ mu. Akanfoↄ afahyɛ bi ne Odwira, Akwambↄ, Ohum, Aboakyere, ne Bakatue. Enti wobɛte din b te sɛ Kwadwo Munufie, Akosua Apoↄ, Kwame Dwira ne deɛ ɛdkeka ho.

 Akokoaa no awofoↄ anaa n’abusuafoↄ asetenam berɛ a wↄwoo no nso tumi ma no din. Sɛ wↄwo obi berɛ a n’awofoↄ anya sika anaa wↄredi yie a wↄtumi to Afiriyie, Atoade, Abayie, Antobrɛ, Sika ne ade.

Sa ara na wↄtumi ma onipa din a ɛkyerɛ sɛ wↄwoo ahohiahia berɛ mu. Enti wↄfrɛɛ obi Abɛbrɛsɛ, Adiyaa, Ahyia, Antobam, Anto ne pii a aka. Onpia a n’agya wui ansa na wↄwoo no no wↄfrɛ no Anto.

Awoↄ Nnidisoↄ

Ↄbaatan mma awoↄ ntoatoa so nso wↄtumi  dema mma no mu biara din a ɛkyerɛ wↄn gyinaberɛ. Deɛ ↄdi kan no de ↄpiesie; ɛyɛ nsɛmfua mmienu na wↄaka abↄm: pue ne sie. Wↄfa no sɛ ɛna no nyinsɛn no te sɛ mfↄteɛ sie na akokoaa no pue firi mu. Enti anka din no yɛ opuesie. Deɛ ↄtwatoↄ no yɛ ↄkaakyire; ɛno nso yɛ nsɛmfua mmienu, ka ne akyire. Deɛ aka no na ɛdidifoↄ yi.

Apɛntɛdin

Akanfoↄ to apɛntedin de si awo-mma-wuo kwan. Mmaa binom wo a awoeɛ hↄ ara na abↄfra no asan. Na Akanfoↄ gyedie ne sɛ abↄfra koro no ara na ↄdi saa akↄneaba no. Na wↄgyedi sɛ abↄfra no na a ↄwↄ sunsum wiase mu na ↄmpɛsɛ abↄfra no tena honam wiase yi mu. Enti Akanfoↄ ma abↄfra no din tantan a ne na a ɛbɛma ne a ↄwↄ sunsum wiase bɛpo no. wↄfrɛ saa din no bagyina anaa apɛntɛndin. Wↄtumi de din fo biara a ɛbɛsi wↄn tirim to no. Bi tumi yɛ apaafoↄ din , mmoa din, nsɛmfua a ɛkyerɛ abufuo, beaɛ ahodↄ a ɛnyɛ akↄnↄ din. Enti wobɛte din binom te sɛ Asↄ – dadeɛ a yɛde bↄ nkoↄfie, Sumina – beaɛ a yɛto nwura ne afideɛ gu, Dↄnkↄ – onipa a ↄyɛ akoa, Ↄsebↄ, Saarabi, Asaseasa, Agyegyesɛm, Abirekyie, Dam – onipa a n’adwene asɛe, ne din biara a ateasefoↄ mpo mpɛ atie. Sɛ wↄka sɛ asasease a, wↄkyerɛ sɛ abↄfra no di ne ho nkyim na ↄwu a, ↄnya asase a wↄde bɛsie no; na wↄbɛgya no ama mmoa adi ne nam. Wↄsane gyedi sɛ din no yɛ anika nso a ɛbɛyɛ abↄfra no animguase sɛ ↄbɛsane akↄ. Enti wↄto din bi te sɛ Dinkyene. Wↄka  di nkyene a wↄkyerɛ no sɛ ↄntena ase nni nkyene. Wↄto Oyinka nso. Ɛnyɛ  weinom nko, na mmom wↄtumi de sekan sensane ne ho ne titiriw n’anim ansa na wↄama no saa din yi.

 ... Yɛbɛtoa so berɛ tia mu wɔ. yɛn YouTube amammerɛ fɛkuo no mu.